回目錄 回上一頁 本篇文章總共有 4 個段落, 13 個語句, 275 個語詞, 444 個音節
Hông-tè teng-ke̍k 皇帝登極
Phian-chip-sek 編輯室
  La̍k go̍eh chhe 10 Tiong-kok Hông- thài-hō͘ chhut-chiàu thong-ti, kóng, “In-ūi Hông-tè chē-ūi ê sî khah chió- hòe, chāi-tiâu tek-khak tio̍h ū lâng kam-tok, hōan-nā gū-tio̍h chàu-chiuⁿ khim-tiám sù-hong chiah ê chèng-sū, chiū thang liāu-lí, só͘-í góa put-tek-put tio̍h sûi-liâm thèng-chèng. Chêng ū chhut-chiàu tēng-kui chún Hông-tè ha̍k-si̍p kàu kok-chèng chiâu bat, chiah thang pún-sin tī-kok. Kàu-taⁿ cha̍p-sò͘ nî kú, Sèng-siōng í-keng ji̍t-ji̍t khîn- khó͘ nî-nî chìn-tek, ē hiáu-tit chú-chhâi chàu-chiuⁿ ê sī-hui, phoe-phêng kó͘-kim ê gī-lí, phòaⁿ-tòan chèng-sū. Só͘-í kin-á-ji̍t Thài-hō͘ soan-tiàu Hông-chhin lâi jū-chí kóng kin-nî tang-cheh Hông-tè teh-beh pún-sin chè-kò thiⁿ-tē, iā koh jū Khim-thian-kàm te̍k-sóan mê-nî ê kiat-ji̍t, thang hō͘ Sèng-siōng teng-ke̍k. Taⁿ góa só͘ jū ê chí-ì lín kok-séⁿ bûn-bú koaⁿ-ôan tio̍h chun-thàn hōng-hêng.”六月初10中國皇太后出詔通知,講,「因為皇帝坐位ê時較少歲,在朝的確著有人監督,凡若遇著奏章欽點賜封chiah-ê政事,就thang 料理,所以我不得不著垂簾聽政。前有出詔定規準皇帝學習到國政chiâu bat,才thang 本身治國。到今十數年久,聖上已經日日勤苦年年進德,會曉 tit主裁奏章ê是非,批評古今ê義理,判斷政事。所以今仔日太后宣召皇親來諭旨講今年冬節皇帝teh-beh本身祭告天地,也koh諭欽天監擇選明年ê吉日,thang hō͘聖上登極。今我所諭ê旨意lín各省文武官員著遵趁奉行。」
  Āu-lâi Hông-thài-hō͘ koh chhut-chiàu kóng Khim-thian-kàm hok-chàu teng- ke̍k ê kiat-ji̍t í-keng te̍k-sóan, chiū-sī mê-nî chiaⁿ-go̍eh 15 ji̍t.後來皇太后koh出詔講欽天監復奏登極ê吉日已經擇選,就是明年正月15日。
  Taⁿ-ū thiaⁿ-kìⁿ chit-ê tāi-chì, sio̍k-chāi Tiong-kok ê Hok-im-hô-hōe tiâu-tî kià chi̍t-tiuⁿ phoe, chhiáⁿ chóng kàu-hōe hiān-sî tio̍h tì-ì thè Hông-tè kî-tó. I-ê phoe kóng: “Chiàu Sèng-chheh kà-sī lán, tio̍h thè chiah-ê ông kap tōa-koaⁿ kî-tó. Hiān-sî ū khah iàu-kín ê tōa-sū teh-beh khí-in, lán tio̍h it-hoat pek-chhiat khún-kiû. Thàn Sèng-siōng la̍k-go̍eh 28 ji̍t chiâⁿ 16 hòe, chit-sî i-ê sim-su sèng-chêng koan-hē chiong-lâi kok- ka ê pêng-tī. Iū-kiam Thài-hō͘ tú-á chhut chiàu tiāⁿ-tio̍h mê-nî chiaⁿ-go̍eh beh hō͘ i teng-ke̍k. Iā bô lōa-kú beh sóan chiàⁿ-keng, só͘-í lán tio̍h pek-chhiat kî-tó Siōng-tè, hō͘ Hông-tè ū tì-hūi thang tī-kok, hō͘ i-ê peh-sèⁿ ē hióng thài-pêng ê hok-khì, hō͘ i pún-sin tn̂g hòe-siū, hō͘ i teng-ke̍k liáu-āu Ki-tok ê hok-im ē ná khui-khoah tī kok-lāi, hōan-nā koaⁿ-ôan peh-sèⁿ ná ài chhin-kīn tō-lí. “今有聽見這個代誌,屬在中國個福音和會刁持寄一張批,請總教會現時著致意替皇帝祈禱。伊ê批講,「照聖冊教示咱,著替chiah-ê王kap大官祈禱。現時有較要緊ê大事teh-beh起因,咱著一法迫切懇求。趁聖上六月28日成16歲,這時伊ê心思性情關係將來國家ê平治。又兼太后tú仔出詔定著明年正月beh hō͘伊登極。也無偌久beh選正宮,所以咱著迫切祈禱上帝,hō͘皇帝有智慧thang 治國,hō͘伊ê百姓會享太平ê福氣,hō͘伊本身長歲壽,hō͘伊登極了後基督ê福音會愈開闊tī國內,凡若官員百姓愈愛親近道理。」
  (Tâi-lâm Hú-siâⁿ Kàu-hōe-pò tē 14 tiuⁿ, 1886 nî 8 ge̍h)(台南府城教會報第14張,1886年8月)
回目錄    回上一頁    清國時代,   1886年, 散文