人講「後生可畏」,實在有道理,特別是chit-ê 資訊進步神速ê 時代,人真正無食kah 老學kah 老bē 煞得。卡早ê 人,若有四、五十歲ê 歲頭,闔bē 著就對少年人講「我食鹽比你食米卡濟」,「我行過ê 橋比你行ê 路卡長」。chit 款話tī 卡早猶會講得,若是chit-mái--lò͘ ,上好是卡mài 講咧,tn̄g 著卡古意卡bat 古禮--ê ,人可能笑笑恬恬m̄ 應聲,若是拄著卡無差不多ê 新人類,無kā 汝hat-- 幾句à 上嘉哉。 |
你無khòaiⁿ chit-mái ê 少年是偌仔厲害咧,科學、語文、歷史、地理、音樂、藝術,尤其靠電腦資訊ê 幫贊,真正是逐項siah-siah 叫,你若用卡早hit 套十年寒窗ê 苦讀方法,真正有影tòe bē-tio̍h 陣。「目眉先生,鬚後生,先生不及後生長。」chit 句話講了誠tùi-tâng ,人,出世著有目眉,到了青春期才開始發嘴鬚,無兩、三年久,嘴鬚若kā 留khit 來,he. 是比目眉長真濟咧,食老雖然m̄ 免認老,著愛繼續拼,但是m̄-thang kā 少年--ê 看phú-phú ,上好kap 少年--ê 加學寡,按呢你才會倒少年,活了卡心適卡有意義。 |
尾仔請斟酌一下,「目眉先生,鬚後生,先生不及後生長。」chit 句話beh 念著念hō͘ 好勢:Ba̍k-bâi seng seⁿ ,chhiu āu-seⁿ ,seng seⁿ put-ki̍p āu (hio)sēⁿ tn̂g 。m̄-thang 念做:目眉sin-seⁿ ,鬚hāu-seⁿ ,sin-seⁿ 不及hāu-seⁿ 長。若無,人會聽無--ō 。
|
| φ註解φ 後生可畏:hō͘-seⁿ-khó-ùi,hiō-seng-khó-ùi。 卡無差不多ê 新人類:m̄-bat 禮貌ê 少年人。 hat:喝,[大聲喝住,給你難堪] khòaiⁿ:看見。 tùi-tâng:[對] 看phú-phú:[看不上眼,看不起] 倒少年:tò-siàu-liân,返老還童。
|
|