台語華語辭典
台灣記憶
[轉去本站首頁]    [轉去台灣俗語鹹酸甜]

三chái 早,加一工。

    社區總體營造是chit-kú tng 流行ê 口號,文建會有心teh 推動,m̄ 知民間ê 配合會達到啥麼程度,營造成績會有外大ê 成果,著愛看以後ê 發展--lò͘ 。
    阮祖家崁頂社區,因為理事長蕭萬福先生ê 用心投入,配合著里長ê 推動,做了bē 少工課,比論講社區ê 水溝清拼,道路垃圾ê 清潔,庄頭巷尾空地整理做休閒場所,攏是發動里民家己出力出錢家己做,蕭理事長按呢講:過去庄內beh 做一項代誌,攏著期待政府補助才來做,政府若無補助也是補助金猶未落來,著khǹg leh 等待,khǹg leh 拋荒,實在m̄ 著,chit-mái 咱愛改變觀念,社區是咱ê ,家己ê 社區家己整理,有補助上好,無補助嘛beh 做,總講一句,「做落去才講」,頂日仔申請ê 補助款已經落來--à ,che. 著是上好ê 證明。
    因為理事長In ê 扑拼,用心招呼,一口灶一口灶去拜訪,去kô͘-chiâⁿ ,頂kó͘ 月成立ê 長青老人bat 字班,到chit-kú 已經有42 人來參加,而且閣讀kah 不止仔趣味。蕭理事長本人tī 加油站teh 上班,問伊哪有chiah 濟時間來進行遮ê 工課,伊講:阮老爸在生時教我一句話,「三chái 早,加一工。」chit-mái 我kā khioh khit 來用,每早起六點前我著起床,隨時到廟庭、四腳涼亭掃土腳,了後轉去食飯準備上班,若tn̄g 著休班,著庄頭庄尾chhōe 人坐,phò-tāu 、泡茶、關心、發現問題,若有發現代誌,著隨時發落去做,mài 講一日ê 工課做外濟,kan-nā 透早hit chām 時間ê 工作著做bē 少,阮老爸ê 話「三chái 早,加一工。」實在有道理。
    少年--ê !有聽見無!「三chái 早,加一工。」早早起,拼落去,成功一定是你--ê。
轉去