台語華語辭典
台灣記憶
[轉去本站首頁]    [轉去台灣俗語鹹酸甜]

三碗飯,兩碗菜湯。

    四、五十冬以來,台灣ê 經濟奇蹟,有人講是政府領導有方,有人講是時勢潮流,科學研究ê 成果。其實多數恬恬扑拼,透早出門到黃昏ê 農民兄弟,日夜連工ê 勞工朋友,才是經濟奇蹟ê 大功臣,敢無影,若無chit 大群人流汗出力,付出青春,付出生命,kan-nā 計劃kap 科技,敢著有法度生產彼呢豐富ê 農產kap 市場商品。
    恁敢知影chit 大群人為啥麼甘願付出扑拼,In 是抱著啥麼理念抑是kan-nā 認命,做牛做馬來拖來拼,少年ê 勞工朋友我卡m̄ 知,若是傳統ê 作穡人,田庄兄哥兄嫂,In 攏是抱著「三碗飯,兩碗菜湯」ê 人生觀,翁某歡喜互相相kēng ,勤快做,儉儉仔食,為著一家大細來犧牲,In ê 心互相靠相倚,食穿chhìn-chhái 免計較,做工課著愛正經實在,che. 著是In 「saⁿ-óa pn̄g ,兩碗菜湯」ê 精神,才有法度長期經營,成做個人家庭美滿ê 人生,嘛促進社會ê 繁榮,國家ê 安定,台灣ê 農民,感謝恁,台灣ê 勞工,感謝恁。
    註:saⁿ-óa pn̄g ,著是互相sio-kēng ,互相sio-pn̄g ,sio-pn̄g 福氣,saⁿ-óa pn̄g 念khit 來kap 三碗飯仝音,人講翁某翁某食飯配菜脯,「三碗飯,兩碗菜湯」ê 生活實在清苦,m̄-kú tī 作穡人ê 嘴裡講-- 出來是彼呢樂天知命,歡喜做歡喜生活。
轉去