台語華語辭典
台灣記憶
[轉去本站首頁]    [轉去台灣俗語鹹酸甜]

賊仔卡猛人。

    定定聽人講,時代誠進步,食是瘦肉、魚、香菇,出門有轎車代替行路,穿--ê 是羊毛、絲絨、娘仔絲,tòa 西洋樓,唱歌看電視,國民教育享受九年,大學生滿滿是。可惜人ê 道德觀念並無tòe-leh 進步,反倒轉愈來愈低路,個人涵養差,世間人我上大,只要我歡喜,beh 按怎著beh 按怎。
    chang 早起學校發生一件hō͘ 人懊惱ê 事件,tn̄g 著chit 款「賊仔卡猛人」ê 代誌,學校長只有氣thiòng lún ,鬱卒在心內。
    代誌是按呢啦:學校門口本成著真鬧熱,門口kap 入來學校內chit 條路,sù-siông hō͘ 人暫時停車佔路,雖然有劃斑馬線,但是效果真差,因為學校無夠硬角,人食你過過。時間是上午十點外,學校長外口辦代誌轉來,騎機車beh ùi 小門入來,才發現一台四攆--ê 坦橫插tī 門內,拄拄仔好將小門cha̍h 死死,大門又閣關咧,不得已借店頭電話通知工友來開門。
    停按呢beh 汰會使得,詳細看清楚是啥人ê 車,原來玻璃窗仔內留一支電話號碼,「歹勢!暫停一時仔,有妨害chiah 敲電話,多謝!」hō͘ 人方便,mài 受氣,隨時電話敲落去,po͘ⁿ .po͘ⁿ . po͘ⁿ . 無人接,抑m̄ 是leh kâng. 騙,電話番是假--ê ,三探聽,四探聽,原來是隔壁超商In ê 車:
    「拜託拜託!恁ê 車擋著路,拜託徙一下好無?恁敢m̄ 知遐bē 使chit 停車?」
    「啥人講--ê ?內面都有人停tī 遐,是按怎kan-nā 趕阮走,豈有此理?」
    「Ah 你將車橫tiàm 學校門,敢bē 傷過分,好意拜託,閣著hō͘ 你大細聲ok ,犯你問。」
    「無 是beh 按怎?」
    「拜託駛離開,若無hit-ê 所在烏白停車,是會使得開罰單--ō͘ 」
    「好啦,好啦,」閣那m̄ 情m̄ 願咧,真正有影「賊仔卡猛人」,你bat 拄著無,是m̄ 是使人氣thiòng (暢)lún (忍)。
轉去