台語華語辭典
台灣記憶
[轉去本站首頁]    [轉去台灣俗語鹹酸甜]

第三戇,哺檳榔嘔紅(hông )。

    最近台北縣長蘇貞昌喝beh 掃除敗壞風俗ê 色情檳榔,應該扑pho̍k-á kā 呵咾支持,mā 期待伊ê 成果早一日實現。
    哺檳榔是台灣人祖先ê 傳統,古早時代檳榔是一種禮物,請人哺檳榔是一種禮貌,tī 中國南方嘛有哺檳榔ê 習慣,唐朝ê 韓愈著hō͘ 人尊重做檳榔祖師,可見檳榔文化並m̄ 是一項歹文化。
    時代是一日一日leh 進步,文明發達ê 所在,除了重視科技以外,對環境衛生kap 個人身體ê 保養,攏誠注重,m̄-chiah 有人按呢警惕哺檳榔ê 人「第三戇,哺檳榔嘔hông 」,看著哺檳榔ê 朋友,檳榔一口一口that (塞)入去嘴孔,金錢ê 扑損mài 論,kan-nā 看伊檳榔汁一嘴一嘴phùi 落土腳,紅紅烏烏tò͘-tò͘ ,講歹聽實在有sêng 吐血嘔hông ,講外歹看著有外歹看,猶有哺檳榔ê hit 支嘴,衛生mài 講,kan-nā 看頭著真bái ,可惜哺檳榔ê giàn 頭總是比人ê 外表卡重要,m̄-chiah 哺檳榔ê 習慣真oh 改。
    「第三戇,哺檳榔嘔hông 」,chit-mái 進步到買檳榔khoe 查某ê 生理嘛有人leh 做,講做啥麼檳榔西施,穿hō͘ 涼涼肉感肉感siâⁿ 人來買檳榔,設計chit 款趁食ê 人,嘛實在誠僥倖,為著趁錢,害人查某囡仔栽,有夠失德。
    惡質文化bē 堪得留--chit ,請各縣市長,學蘇貞昌ê 魄力,大家做夥來掃除色情檳榔。
轉去