台語華語辭典
台灣記憶
[轉去本站首頁]    [轉去台灣俗語鹹酸甜]

選舉無師傅,用錢買就有。

    選舉選舉,選你去死;買票買票,著愛hō͘ 選無著!
    Tī chit-ê 「選舉無師傅,用錢買就有」ê 惡質選舉文化之下,莫怪連庄腳查某人都會咒出chit 款歹聽話來。話是有卡粗魯歹嘴,m̄-kú 反應著有良心有覺悟ê 百姓,長期來對選舉買票ê 不滿,嘛是真實在。
    四十外年前,彰化縣第一界縣議員選舉,有一位候選人蕭XX ,kap Siau,Lah-jih 仝姓,牽khit 來是家己人,所以阮庄內蕭姓宗親攏beh 支持擁護伊。有一暗,阮姓蕭--ê ê 候選人送來四、五條芎蕉牌ê 薰(香煙),khǹg tiàm 阮人客間仔,請逐家pok 薰,拜託逐家選伊一票,當時阮兜是厝邊隔壁ê 集會所,每暗著有厝邊來遮坐,開講庄裡大細項代誌,kap 參詳明仔載田裡穡頭ê 工課。
    暗頭仔厝邊隔壁ê 親堂開始來報到,阮老爸. 薰. 提咧,一支一支請:拜託拜託,縣議員chiah 選hō͘ 蕭XX 啦ho͘ hN !
    應該,應該,家己人,閣有薰hō͘ 咱suh ,chiah 慷慨,無選伊beh 汰會使。
    看在眼內,哪會kap 我tī 冊內讀--ê 道理tàu bē 來,che. 無kā 阿爸講一下beh 哪會使?
    阿爸!人選舉bē 使請人--neh !he. 叫做『賄賂』,是犯法--ê 。
    囡仔人有耳無嘴,你是知che 啥?mài 插嘴。
    阿爸!你m̄ 是講讀冊著愛bat 道理,請人pok 薰是『賄賂』,冊內有講,阮老師嘛有講,阿爸!你若講按呢我m̄-bat ,我著無愛去讀冊…
    好啦!好啦!你 chit-ê 囡仔咧!…
    有影,明仔暗著無khòaiⁿ (看見) tī 阮人客間仔leh 請薰--a 。hit 年Siau,Lah-jih 才讀國校四年--ê niâ 。
    到kah 大漢出社會,有選舉權閣參與著選務工作,看了真濟真詳細,o͘-se 買票愈來愈厲害,愈來愈m̄ 驚人知,送茶箍(肥皂)、味素,閣來是現金二十、三十,四五十,一擺一擺起,一百、兩百無算濟,四、五十年來,買票選舉是正常,無買會tiâu 才是奇怪。1998 年正月底ê 鄉鎮長、縣議員選舉,一票無一兩千箍(元)大概bē 通過,「選舉無師傅,用錢買就有」,自台灣地方自治到taⁿ ,無買票選會tiâu ê 候選人有幾個?敢tǹg 胸坎仔咒誓講「我無」ê 人,大概無幾個才著。
    過年到--à ,甜粿錢有人出便便,請逐家期待。
轉去