台語華語辭典
台灣記憶
[轉去本站首頁]    [轉去台灣俗語鹹酸甜]

三腳步,一坎店。

    人講台灣錢淹腳目,台灣,錢. 真濟;閣講台灣無三日ê 好光景,台灣人,有影真歹趁食。chit 兩句話若kā khǹg 做夥來講,實在矛盾,事實上並無啥麼矛盾ê 所在,台灣人錢. 真濟,確實無錯,kan-nā 看逐家ê 消費著知--a ,m̄ 免閣議論;講無三日好光景,嘛是chiaⁿ 實--ê ,因為人濟土地狹,傷競爭矣。
    著是競爭傷厲害ê 關係,市面上若有一項仔卡好趁ê 生理,隨時著有人tòe-leh 做,親像五、六年前ê KTV ,一下時行,逐家愛唱歌,KTV ê 店一間一間開,唱歌ê 枋仔厝四界有,連飯店、旅社、茶店…真正無se 不有,人講「三腳步,一坎店」嘛無過份。其他像釣蝦仔場、速食店、流行衫仔店…講嘛講bē 了。
    台灣. 真正「三腳步,一坎店」ê 生理是啥你敢知?檳榔擔仔,che. 才是三腳步著一坎店ê 生理,台灣人哺檳榔ê 歷史有外久,Siau,Lah-jih 無研究,m̄-kú 會記得卡早無chiah 濟人食,嘛無像chit-mái 按呢哺無歇,閣那像leh 哺sì-siù 仔咧,哺檳榔是一種台灣文化無m̄ 著,但是為著beh 表示咱是台灣人,才來哺檳榔嘛無啥麼必要,哺檳榔歹處比好處卡濟,相信逐家攏知影,第三戇,哺檳榔嘔紅(hông ),實在無衛生無好看相,Siau,Lah-jih 奉勸鄉親朋友弟兄,無食--ê mài 學食,有食--ê 哺卡少咧,有決心改掉上蓋好,為著健康,喝改著改,你ê 修養一tó͘ 勇。
轉去