台語華語辭典
台灣記憶
[轉去本站首頁]    [轉去台灣俗語鹹酸甜]

狗都會踢著錢。

    古早人講台灣錢淹腳目,意思是講台灣chit-ê 所在誠好趁食,只要願做,免驚矣無錢thang 趁。
    有人講chín.ê 景氣真bái ,hō͘ 人感覺懷疑懷疑,你kā 看,chit 擺ê 縣市長選舉,鬧熱滾滾,開著chiah 濟錢,文宣海報、廣告看板、薰酒檳榔、三頓ê 開銷,猶有o͘-se 選民ê 買票錢,一開著算千萬,chiūⁿ 億,敢有影景氣bái ?
    講著買票錢,chit 款賄選ê 惡質文化,立法委員謝聰敏先生質詢講:o͘-se 買票ê 情形誠嚴重,連「狗都會踢著錢」,實在無過分,過去ê 買票是買穩--ê ,有買有投,有買有效,無穩tak-tak (當)ê 票無買;chit-mái 是買歸遍--ê ,除了hō͘ 人點油做記號--ê 以外,有選舉權--ê 攏有份,若是厝邊隔壁有收著買票錢,偏偏kan-nā kā 我làng 過,he 就bē-tàng 將按呢放hō͘ 做拄好,用討--ê 嘛beh kā 伊討kah 有,人講『不拿白不拿』,無leh 戇-- 講!所以若買有一、兩成ê 效果著bē bái--à 。
    咱按呢假設kā 想看覓,選舉前hit 一、兩工,候選人提錢買票ê 狀況,各柱仔腳分錢hō͘ 選民,敢無sêng 用iā--ê ,iā kah 一四界。縣議員、鄉鎮長選舉閣到--à ,有人無閑抄買票ê 名單,有人chông 買票ê 銀票,有人猶閣teh 煩惱選舉ê 惡質化,卡濟ê 人leh 歡喜過年炊甜粿ê 甜粿錢有了了,因為有人出便便。
    逐家著小心,選舉到--à ,「狗都會踢著錢」,這是一句新ê 俗語,行路著sè-jī ,當你踢著錢ê 時陣,beh khioh 抑m̄ khioh ,問你家己。
轉去