台語華語辭典
台灣記憶
[轉去本站首頁]    [轉去台灣俗語鹹酸甜]

食到老,學到老。

    庄腳祖家社區beh 辦長青bat 字班,叫我轉去tàu 相共。為著beh hō͘ 遮ê 老歲仔班學了卡有趣味,閣會凍bat 一寡漢字kap 羅馬字,教學晉前用心編一份用漢羅lām 寫ê 台灣念謠、童謠、囡仔歌,hō͘ In 學轉去教厝內ê 序細,giú 轉來公孫仔、媽孫仔ê 感情,應該是一層誠有意義ê 代誌。
    開班第一暝,出席--ê 有三十外人,攏是查某人,五十外、六十外,嘛有七十thóng--ê ,問遮ê 阿媽級--ê bat 字無?煞逐家搖頭,細漢抑無入學堂,真正有影m̄-bat 一字「了」-- 字,In 要求講m̄-thang 教傷深,食kah chiah 老--a ,才beh 來學bat 字,實在感覺誠歹勢,心內真驚惶。
    人講老人囡仔性,我教In 著kā 家己當做是囡仔beh 去讀冊按呢,放卡自然咧,老師按怎念,恁著按怎念,看chiâ 念卡大聲,「食一歲學一歲」,「食到老,學到老」,恁敢m̄-bat 聽人講,恁chit 種精神是會凍o-ló--ê ,雖然老師是徛tiàm 頭前台仔頂,其實我嘛是tī-teh 學,學恁ê 經驗,學恁ê 純正台灣話,恁可能m̄ 知ùi 恁嘴裡講出來ê hō-ló 話,是偌仔有價值咧!
    敢按呢?
    真正有影,恁敢無感覺若beh kap 孫仔講話,著發覺真食力!
    有影to 著!
    Che. 著是重要ê 所在,媽孫仔話語bē 通,m̄ 是阿媽m̄ 著,嘛m̄ 是囡仔m̄ 著,只是咱愛了解,囡仔bē 曉講台語,咱做序大--ê 著kā 教,北京語放hō͘ 學校去學著好,tī 厝內,咱著kap 孫仔講咱ê hō-ló 話,按呢咱ê 話m̄-chiah bē 走精失傳去。
    有影to-tio̍h ,m̄ chē 啥!阮孫--ê 講kah he 北京語,咱也聽無啥有,咱講咱ê 話,孫--ê 嘛kā 你講「不對,不對!」人In 父仔囝,母仔囝攏leh 講北京話,咱若無卡用心來kā 教台語有影bē 使得。
    恁講做阿媽--ê 有重要無?
    有影to 著!
轉去